Ós lèste nówts

Mittwoch, 5. Februar 2020 - 18:59 Uhr
Oos lèste nòws,

Leef wammese en weimeskes,

Oos nòw prinse zeen ongertösse al good ingebörgerd, en höbbe auch al aardig gèt òwtstappe gedoeën, en jao dao komme d’r nog aardig gèt aan. Mèr op di-j meneer lieëre ze oos Prinse waal uuveral kènne. En jao, ze vènge het zelf auch allemaol geweldig.

Op zaoterdig 15 fibrewari is er de prinsereceptie en het prinsebal. Dit geit doeër in het Parochiecentrum in Mezeik. Höb gieë nog gei kestumke, awaal, dèn wuurt het hoeëg ti-jd om uch d’r ein aan te sjaffe. De receptie begint om 19.11 ore, en het bal om 21.11 ore.

Op vri-jdig 21 fibrewari is de verkleide wandeltocht van de sjoeële in Mezeik – dae optocht begint om 13.30 ore oppe Philipslaan, en eindigt oppe mèrt. Kom zieëker ins ki-jke – het is de meu-jte. ’s Aoves beginne wieë d`r dèn aan met het karnavalsconcert in CC Achter Olmen om 20.11 ore. Dit jaor wuurt het verzörgt doeër de Stedelijke Academie voor Kunsten - of om het in het Mezeikers te zègke, de mezi-jksjoeël. De prissentatie is dit jaor vuur de ieërste kieër in han van Belinda Bielen en Freddy Corstjens. Dao zeen nog ei paar kaarte te verkri-jge bij het Cultureel Centrum. Mèr gieë moot rap zeen.

Op zaoterdig 22 fibrewari geit het dèn hieëlemaol loos met het awt
wi-jf. Vanaaf 20.11 ore zeen de aw wi-jver van harte welkom op het awt stadhòws, woeë dèt de Börgemeister de mach zal uuverdraage aan oos Prinse , Erik III en Warg I. Nao het officieel moment goeën wieë dèn in de Mezeiker café`s de aw wi-jver verkeezinge mèt maake.

Op zondig 23 fibrewari is er het verkleid kènjerbal en Bal Carnaval in ein organisatie van de Roodkapjes – dit geit doeër in het Parochiecentrum. De Groeëtridders goeën op zondig diverse stoete beki-jke. Dit om te ki-jke of dao gein groepe of waages zeen di-j de meu-jte zeen om in ooze hawfvastestoet mooge mèt te doon.
Op maondig 24 fibrewari is er in de naomiddig het twieëde verkleid kènjerbal van de Roodkapjes, en de alom bekende Mezeiker straotcarnaval. Wieë zeen weer benòwd welke creaties zich eederein weer bedach haef.

Op dieënsdig 25 fibrewari bezeuke oos Prinse saame mèt de Raod het bejaordehòws. Dao is het auch eeder jaor ei fi-jn fieës, woeë wieë auch gaer act de présence gieëve. En ’s aoves is er de kloonjestoet. Dae begint om 20.11 ore – allein is het parcours ei bietsje verangert, dit ivm de wirke oppe Bleumerstraot. De stoet geit recht de mèrt uuver, vuur het auwe Stadhòws doeër nao de Kirkstraot, dèn vuur de kirk doeër, dèt is de Waagstraot, richting Prinsekot (De Vagant) – dao nao rechts richting Eikerstraot, en vanaaf dao is het de gewuune omlòwp wi-j dèt d’r al jaore bekènd is – vanaaf de Eikerstraot, zoeë nao het Bad, richting Bosport, dao ei rundsje maake, de Bosstraot op om dèn te eindige oppe mèrt. Dao wuurt dèn het Weimeske opgelaote doeër oos Prinse.

Op goonsdig 26 fibrewari slòwte wieë dèn aaf met eine hieëring op asgoonsdig. En dèt kènt vuur sommige onger oos auch nog eine lange daag en nach wieëre…

Daonao maake wieë oos op vuur de hawfvaststoet van 22 mieërt 2020. Dao kri-jgt gieë laater nog mieër nòws uuver. Waat de hawfvaststoet aangeit – de steundri-jhook – dao zeen de minse mèt aan het rondgoeën. Hae kost 10 Euro, en woeënt gieë bòwte de omlòwp dèn kri-jgt gieë dao 2 vri-jkaarte bi-j. Kènt gieë neet wachte tot ze bi-j uch aan de duur zeen gewaes, awaal, hae ligk auch bi-j Rooske oppe Bosstraot of bi-j Baer van Minsel. En auch bi-j de Groeëtridders kènt gieë terech.

Het Wammeseurke – op LRM 107.6 FM kènt gieë eedere zondig tösse 12 en 13 ore lòwstere noa het lèste nòws uuver de vereiniging en de karnaval.

Es lèste puntsje bli-jf iech aanhoeële dèt oos vereiniging nog alti-jd dringend op zeuk is nao nòw Groeëtridders, want dae sjoeëne karnaval en stoet in Mezeik, mòt verder bli-jve bestoeën. Gieë moogt uch alti-jd kandidaat stelle op vorst@heiligwammes.be of bi-j ein van de Groeëtridders.

Vorst Eric en de Groeëtridders van Het Heilig Wammes Mezeik.

Anmelden