Leef wammese en weimeskes

Ongertösse höbbe oos hoeëgheede Prins Gijs I, Jeugdprins Wout I en Jeugdprinses Julie I zich al aardig laote ki-jke in Mezeik. Zoeë is d`r al de oeëpening van het Prinsekot bi-j Marathon en het vuurstèlle van hun in de Mezeiker café`s.

Op zoaterdig  24 jannewari waas òs 7x11 jubileumresepsie in het Parochiecentrum eine geweldige naomiddig. Zaoterdig 30 jannewari in de naomiddig zeen wieë òwtstap gewaes nao de kènjerzitting bi-j òs vrund in Kieësing  en saovës zeen wieë nao Swalmen gewaes dao is het naef van ooze gooje Prins Gijs I ès Prins ówtgëroope. Zondig 1 fibrewari zeen wieë mèt ooze Jeugdprins Wout I en Jeugdprinses Julie I nao de Jeugd happening van de Breese Stoepluipers gewaes.

Vergieët zieëker neet zaoterdig 7 fibrewari  den is d`r de prinsereceptie en prinsebal. De receptie begint om 19.11 ore en lupt uuver om 21.11 ore in het prinsebal. Wieë hoeëpe dao hieël väöl verkleide minse te mooge ontvange. Auch ooze Prins Gijs I hoeëpt dit. Laot oos d`r saame ei geweldig fieës van maake. Plaats van het gebuure is in het Parochiecentrum in Mezeik.

Wilt gieë eine steundri-jhook van de stoet, contacteer dèn eemes van de Groeëtridders estebleef, en wieë zulle d`r vuur zörrege. Dao zeen minse mèt de dri-jhook aan het rond goeën, en ze zeen missji-jn nog neet tot bi-j uch geraakt, laot het weite, en dèn kump het in orde. Wieë gieëve aan dèt de opbrèngst van deeze dri-jhook volledig ten gunste kump vuur de organisatie van de stoet.

Hauw auch de Facebookpagina`s van de versjillende Mezeiker wi-jke in de gaate, want dao stuit het ein en anger te doon te kommende wieëke.

Auch is d`r eedere zondig tösse 12 en 13 ore het wammeseurke op 107.6 radio LRM, met het lèste nòws uuver en van de vereiniging en auch nòws uuver alles wat met de karnaval te maake haef. En dit tot 8 mieërt 2026.

De Vorst en Groeëtridders van Het Heilig Wammes