Ós lèste nówts

Leef Wammese en weimeskes, Nòw de karnavalsdaag achter oos ligke, zeen wieë volop baezig met de vuurbereiding van de stoet. De ieërste insjri-jvinge zeen aan het bènne komme, mèr…. Dèt kan nog vaöl bieëter. Daorom doon wieë eine hieël wèrreme oproop aan Mezeik en zi-jn inwoeëners. Pak uch bi-jein met de buure, met uch kamereu-j, vereiniging, zangkoeër, mezi-jkgroep en neum mèr op, doot uch ei pèkske aan, en doot mèt aan ooze stoet. Insjri-jve kan tot 31 mieërt via stoet@heiligwammes.be Doot dit estebleef, en zoeë kènne wieë allemaol d`r vuur zörrege dèt oos Prinse Erik III en Warg I de stoet kri-jge dae ze verdeene, en woeë ze al zoeë lang op wachte. Wieë rieëkene op uch allemaol om dao ei groeët fieës van te maake. Dèt het gein normaal sezòwn is gewaes, hoove wieë uch neet mieër te vertèlle. Het waas ei sezòwn met valle en opstoeën, en soms hèller valle dèn opstoeën, mèr good, dao is van dit sezòwn tot nòw tòw gemaekt waat dèt d`r van te maake waas. En… het is nog neet gedoeën…. Vuur de leefhöbbers is d`r vanaaf 3 april het Wammeseurke op radio LRM op de 107.6 FM – dit tösse 12 en 13 ore. Dao zulle nog 4 òwtzèndinge zeen in april, dit om uch wèrrem te maake vuur de stoet. Op 1 mei, de daag van de stoet, zal Johan weer de vleegende reporter zeen, dae uch op de huugte geit hauwte op dae daag van het reile en zeile in Mezeik. Wieë goeën òngertösse wu-jer wirke aan de vuurbereiding van de stoet, en hoeëpe op hieël vaöl Mezeiker deilnummers. Vorst Eric en de Groeëtridders van Het Heilig Wammes.

Mezeik bedankt,

Aan eederein dae d`r saame met oos eine fi-jne vastelaovend van haef gemaakt, hieël , hieël vaöl bedankt. Ondanks alles höbbe wieë allemaol d`r toch gèt van probeere te maake, en dit in de maote van het maögelike. Laot oos hoeëpe dèt volgend jaor alles weer op ein normale meneer kan doeër goeën, en dèn zulle wieë zieëker weer d`r ne sjikke vastelaovend van maake. Eine speciale dank aan het Stadsbesteur, de cafébaaze, de Awt Prinse, de Awt Jeugdprinse vuur hun engagement dèt ze mèt di-j daag getoeënd höbbe. En nòw goeën wieë d`r allemaol vuur zörrege dèt ooze stoet van 1 mei auch ei succes kan en geit wieëre. Wilt gieë mèt doon aan deeze stoet, dèn kènt gieë uch aanmelde via stoet@heiligwammes.be Zieëker eine speciale oproop nao de mezeiker groepen, einzelgängers, klein groepkes enz. – meld uch aan en doot mèt, zoeë dèt wieë Prins Erik III en Jeugdprins Warg I eindelik de stoet kènne gieëve woeë ze al zoeë lang op wachte, en dae ze verdeene.

Eine 3 döbbele Mezeik alaaf, Vorst Eric en de Groeëtridders van Het Heilig Wammes.