Leef wammese en weimeskes

Nao effe bekomme te zeen van dèt geweldige hawfvastewieëkend, is hi-j, vuur dèt wieë effe in min of mieër röstmodus goeën, oos lèste nòws.

Waat waas miech dèt allemaol in het hawfvastewieëkend.  Het is begos met de uuverhandiging van waage vuur oos Jeugdprinsepaar Maddox I en Lourdes I.  Eine prachtige waage, gebaseerd op ein figuur òwt de Efteling van het carnaval festival.  Nog ins eine dikke preficijat aan de wi-jk Van Eycklaan.  ’s Aoves waas het dèn de beurt vuur de waage van Prins Bert VIII, en auch dao ein sjot in de roeës.  Eine prachtige olifant, en auch hi-j nog ins eine dikke prefici-jat aan de wi-jk Wörfeld.  Daonao nog efkes gepreufd van de Nacht van Wörfeld.  Auch dèt waas ei tof fieëske. 

De zondig van de stoet dèn, op ti-jd d`r òwt vuur het klaor zètte van de nadars, en toen het kestumke aan en op nao de stoet.  Waat ei waer, dao kèns te allein van druime.  Het waas eine top daag, eederein waas in opperste stömming, en zoeë huurt ziech dèt auch.  Auch nao de stoet is het fieës nog eine hieële lange ti-jd doeër gegange.  Wieë bedanke eederein, mèr auch echt eederein dae van deeze hoeëgdaag eine echte hoeëgdaag gemaakt haef. Zoeë waal vuur ès achter de sjerme, jonges en maesjes, van harte bedankt, want zonger dees hulp kri-jgs te dit neet klaor. Wieë vergieëte auch neet oos partners en sponsors, want auch dae financiële steun is nuudig. En auch de Stad vuur het mèt dènke, het mèt organiseere, bedankt.

Het waas vuur de Groeëtridders Teike (nao 28 jaor), en Mathy (nao 24 jaor), hunne lèste stoet.  Wieë bedanke hun nog ins langs deeze wieëg vuur alles waat ze vuur de vereiniging gedoeën höbbe.  Auch vuur miech ès Vorst waas het mi-jn lèste activiteit.  Iech bedank (en dèn sprieëk iech auch òwt naam van Teike en Mathy), eederein,  dae in al di-j jaore dèt wieë d`r bi-j woeëre, vuur alle steun, de leef waordsjes, de tips, het mèt organiseere, oos op wieëg helpe, hi-j en dao de traone, het lache,….en zoeë kènne wieë bli-jve doeër goeën, het is te väöl om op te neume.  En bli-jf dit auch doon nao oos opvolgers tòw, want zoeë bli-jft de carnaval in Mezeik zeen waat het is en nog zal wieëre.

Iech gaon nòw vuur de lèste kieër aafslouwte mèt eine dikke dri-jdöbbele alaaf,

Prins Bert VIII, Jeugdprins Maddox I en Jeugdprinses Lourdes Alaaf

Mezeik Alaaf

Het Heilig Wammes Alaaf

Nòw net Awt Vorst Eric, en de Groeëtridders van Het Heilig Wammes.